டிஸ்லெக்ஸியா என்றால் என்ன?
டிஸ்லெக்ஸியா என்பது ஒரு கற்றல் குறைபாடு. இது வாசிப்பு, எழுத்து மற்றும் எழுத்துக்கூட்டி வாசிப்பது எழுதுவது ஆகிவற்றைப் பாதிக்கும். இது மரபுவழி வரும் நரம்பியல் பிரச்சனை.
ஒரு எழுத்தைப் பார்க்கும்போது அதனோடு ஒரு ஒலியை பொருத்த முடியாத போதே இந்தப் பிரச்சனை உருவாகின்றது. ஒலியைப் பொருத்த முடியாத போது அந்த எழுத்து கிறுக்கல் போலவும், இடம் மாறுவது போலவும், தலை கீழாக இருப்பது போலவும் அவ்வெழுத்துகள் தோற்றமளிக்கும். இது ஒரு குழப்பத்தையும் மன அழுத்தத்தையும் பிள்ளைகளிடம் உருவாக்கும்.
அடுத்து, ஒலிகள் கற்பிக்கப்பட்டாலும் ஒலிகளை ஒன்றோடு ஒன்று சேர்ப்பது மிகப் பெரிய சவாலாகத் தெரியும். ஒலிகள் சேர்ந்தே ஒரு சொல் உருவாகின்றது என்பது பயிற்றுவிக்கப் பட வேண்டும்.
எழுத்துக்களின் ஒலிகள் தெரியாத நிலையில் எழுத்து பெரும் சவால் ஆகிவிடுகிறது. இந்நிலையில் எழுத்துக்கூட்டி எழுதுவது இயலாமல் போய்விடுகிறது.
ஆகவே, ஒவ்வொரு எழுத்தோடும் ஒரு ஒலியைச் சேர்த்து தனித்தனியாக சொல்லிக் கொடுப்பது இன்றியமையாதது ஆகிவிடுகிறது.
டிஸ்லெக்சியா உடைய பிள்ளகளுக்கு குறுகிய நினைவாற்றல் குன்றி இருக்கும். இதனால், ஒலிகளைச் சொல்லிக் கொடுக்கும்போது ஒவ்வோர் எழுத்துக்கும் / ஒலிக்கும் ஒரு படத்தைக் காட்டி பயிற்றுவிக்க வேண்டும். படம் ஒன்றே அவர்களுக்கு ஆரம்பத்தில் ஒலிக்கான சின்னமாக மூளையில் பதிவாகும்.
டிஸ்லெக்சியா உடைய பிள்ளைகள “மெது பயில்வோர்” என்று அழைப்பது அபத்தம். காரணம் இவர்களுக்குச் சராசரி அறிவோ அல்லது அதற்கும் மேற்பட்ட அறிவுவோ இயல்பாக இருக்கும். மெது பயிவோருக்கு சராசரிக்கும் குறந்த அறிவே இருக்கக் கூடும். இவர்கள் தங்கள் வயதுக்கேற்ற அறிவைப் பெற்றிருக்க மாட்டார்கள். இவர்களுக்கும் ஒலி வழி மட்டுமே கற்பிக்கமுடியும். இவர்களுடை அடைவு நிலை டிஸ்லெக்சியா பிள்ளைகளுடைய அடைவு நிலையைவிட மிகக் குறைவாக இருக்கும்.
டிஸ்லெக்சியா உடையவர்களுக்கு மரபுவழி கற்பிக்கும் முறை எந்தப் பயனையும் அளிக்காது.
டிஸ்லெக்சியாவை எவ்வாறு அடையாளம் காண்பது?
வாசித்தல்
- எழுத்தையும் ஒலியையும் சேர்த்துப்பார்ப்பதில் சிரமம்
- ஒலிகளை நினைவில் நிறுத்துவதில் சிரமம்
- ஒன்றுபோல் உள்ள ஒலிகளை ஒலிப்பதில் தடுமாற்றம்
- ஒலிகளை மாற்றுவது, தவிர்ப்பது, அல்லது இல்லாத ஒலியைச் சேர்ப்பது
- பார்த்து வாசிப்பதில் சிரமம்
- ஒலிகளை அசையாக்குவதில் சிரமம்
- பல அசைகளுடைய சொற்களை வாசிப்பதில் சிரமம்
- ஒலிகளைப் பிரித்துச் சேர்த்து சொல்லாக்குவதில் சிரமம்
- வாசிப்பதில் தயக்கம் மற்றும் மெதுவாக வாசித்தல்
- நிறுத்தற் குறிகளை அடையாளம் காண்பதில் சிரமம் அதனால்
- உணர்வற்ற வாசித்தல்
- வாசிப்பதில் ஆர்வம் காட்டுவதில்லை
- எழுத்துகளை பிரித்துச் சேர்ப்பதில் கவனம் போய்விடுவதால் புரிதலோடு வாசித்தல் சிரமம்
- தெரிந்த சொற்கள் குறைவு
- வாசிக்கும் பனுவலின் பின்னணி தெரியாமல் இருக்கும்
எழுத்துக் கூட்டி வாசித்தல்
- ஒலிகளை நினைவுப்படுத்துவதில் சிரமத்தை எதிர்நோக்குதல்
- குறில் நெடில் எழுத்தொலிகளை உச்சரிக்கும் போது குழப்பம் ஏற்பட்டு தவறு செய்தல் (ப மற்றும் பா)
- சொல்லின் இறுதி ஒலிகளைக். கேட்பதில் சிரமத்தை எதிர்நோக்குதல்
கணிதம்
- கூட்டல், கழித்தல் அடிப்படையை புரிந்துகொண்டிருந்தாலும், கணக்கிட்டு பதில் எழுத முடியாமை.
- எண்களை அடையாளம் காண முடிந்தாலும், கூட்டுவதில் /கணக்கிடுவதில் சிரமம்
- கணக்குடன் கூடிய சொற்கள் கடினமாக, அச்சுறுத்துவதாகத் தோன்றும்.
- பணத்தை கையாள்வதில் சிரமத்தை எதிர்கொள்வர்.
- குறியீடுகளை புரிந்துகொள்வதில் சிரமம்
எழுதுதல்
- வெண்பலகையில் எழுதப்பட்டிருக்கும் பாடங்களை பார்த்து எழுதுவது சிரமம்
- எழுத்துப்பயிற்சிகளை செய்து முடிக்க மற்றவரின் துணைத் தேவைப்படும்
- வழக்கத்திற்கு மாறாக பென்சிலை உறுதியாகப் பற்றிப் பிடிக்க இயலாமை
- எழுதும் போது முறையாக அமர்ந்து எழுத முடியாமை
- தலையை கவிழ்த்துக்கொண்டு எழுதுதல்
- சீரற்ற எழுத்து நடை
- எழுத்து அல்லது சொற்களை தெளிவாக எழுத இயலாமை
- மெதுவாக எழுதுவார்கள்
- இடது மற்றும் வலது கையை அடையாளங்காண்பதில் குழப்பம்
- கை-கண் ஒருங்கிணைப்பில் சிரமம்
நினைவில் இருத்திக்கொள்ளும் ஆற்றல்
- குறுகியகால எல்லையுடைய நினைவுகள்
- குறுகிய பட்டியல்கள் மற்றும் அறிவுறுத்தல்களைக் கூட நினைவில் வைத்துக் கொள்வதில் சிரமம்.
- கற்பித்தவற்றை நினைவில் இருந்து மீட்டெடுத்து தேர்வெழுத இயலாமை
- தகவல்களை நினைவில் ஒருங்கிணைக்கும் அறிவாற்றல் குன்றியிருக்கலாம்
- கற்றலுக்குக்குத் தேவையான கால அட்டவணை, மற்றும் பொருட்களை ஒழுங்கமைத்தலில் சிரமம்
பொது பண்புகள்
- குன்றிய தன்னம்பிக்கை இருப்பினும் எல்லாம் தெரிந்ததுபோல் காட்டிக்கொள்ளுதல்
- பள்ளித்தேர்வை அச்சுறுத்தலாகக் கருதி மனச்சோர்வடைதல்
- பாடம் கற்கும் நேரத்தில் கவனச் சிதறல்
- பெரும்பாலும் ஓவியம், நடனம், இசை, நடிப்பு, விளையாட்டு இவற்றில் திறமை உடையவராய் இருப்பர்
- செய்ய வேண்டியவற்றில்/ செய்து முடிக்கவேண்டியவற்றில் குறைவான கவனமே கொண்டிருப்பர்
- அமைதியற்ற நிலையில் காணப்படுதல்
- வழக்கமாகச் செய்யும் செயல்களில் ஒழுங்கின்மை
- படிக்கவோ,எழுதவோ நேரும்போது வயிற்றுவலி, தலைவலி என புகார் கூறுதல்
- காலணி நாடாவைக் கட்டுதல் மற்றும் சட்டை பொத்தான்களை சரிவர பொருத்துதல் ஆகியவற்றில் சிரமத்தை எதிர்நோக்குவர்
- பள்ளி வேலைகளில் சீரற்ற நிலைக் காணப்படுதல்
